|
اجانه العيد واحنه ابعيد عن فرحتنه والاعياد
يريته ما يهل هلال عيد الفطر واحنه ابعاد
اجانه العيد والخيره من اهلنه ذبـح الجلاد
اجانه العيد واحنه مطشرين بكل وطن وبلاد
وفرحة عيدنه الچانت بعد يا وسف ما تنعاد
چِنه ابعيد المبارك تحنينه العزيزه وتفرح الويلاد
چِنه نجتمع بالعيد تتلاگه الوجوه وتگعد الاحباب
واحنه بنشوة الاعياد فرحانين كل ساعه التمر تندگ علينه الباب
نصد للباب نفتحها نصيح لأمنه يايمه اجو اصحاب
وچنه زغار متونسين وعلينه تمر نسمة هوه الجلاب
وامنه اتشوفنه بالعيد فرحانين منحسب الدنيانه يعيد احساب
يعيد بيوم من اتهل يموت اعلى الشفاف اعتاب
وچنه انروح للكوفه على الشاطي غدانه يصير نضحك والنهر خنياب
ونروح المسجد الكوفه نعيّد احنه السفير اللي وگع
وانصاب
ونعيّد ميثم التمّار نركب بالمراجيح ونشگ اثياب
چنه اشلون چنه اشلون صار الدهر بينه ايخون
ويحمل اعلينه مصاب فوگ امصاب
وهذا اليوم اجانه العيد واحنه من الوطن غيّاب
ولا فرحة بگت عدنه وكل عيد اليمرنه بالغرب چذّاب
علينه اشگد تمر اعياد منشوف الفرح بيها
ولا نتعايد بكل عيد غربتنه تعت بالروح تاذيها
ولو نمشي بشوارع دار غربتنه فلا انشوف الاحبه ولا نلاگيها
احبّتنه بسجن صدام كلهم گّضوا وسفه وحيف
علينه اتعدوا اومرّوا مثل ما يمر بينه الطيف
علينه اتعدوا ومروا مثل مزنة امطار الصيف
اسارى اصبحوا بيد اجلاف
ما تدري صفت چا وين اهاليها
مقابرهم جماعية صفت آلاف
ما تگدر تعدها ولا بعد تنشاف
فزع منهم نغل صبحه وعلى كرسي الحكومه ايخاف
فزع منهم و چان ايخاف
و من اشباح اهلنه ومن هوه الصفصاف
چان امن النخيل يخاف
من الهور والبردي يعيد ومن گصب ذيچ المضايف
من عُگلها ايخاف
***
يعيد استحلفك بالله هم مريت بالحضره
وهم شفت البيارغ سود فوگ الصحن منتشره
هم زرته لعلي الكرار امير المبدء وفكره
گعدت بصحن داحي الباب يوم 19 رمضان يوم انصابت الگمره
شفت الناس من چانت تزوره لحيدر الكرار تشچي بنار مستعره
هم مريت بالوادي وشفت ذاك الگطع لجل الشعب نحره
هم زرت الصدر يا عيد هم صليت هم ابچيت يم گبره
لون اتروح سلمنّه يعيد اعليه بكل احوالنه اتخبره
وتگله ليش من ينخاك شعبي ما تفض الگبر وتنصره
كبر جرح الگلب گله صفه من النجف للبصره
وعلى الدلال الف چانون تلهب نار متوجره
***
انشدك هم رحت يا عيد صوب اديارنه الحلوه
هم شفت الاهل يا عيد لو صارت عليهم نايبه وبلوه
صحيح من الشفاف انباگت البسمه وغدت ايامهم تطوه
اظن شفت الاحباب بعتبة البيبان للغياب منتظره
صحيح اطفالنه معيدين لو صارت تعيش العيد الف حسره
هم اتحنوا بهالعيد لو بالدم تحنوا لو على الغبره
هو گعدوا اهلنه وسولفوا بالعيد واتسامروا بالسهره
هم شفت الحنينه اللي انكسر منها الگلب وانجبر بالكسره
***
انشدك هم بعد مريت برض الطف يعيد وشفت روح ومهجة الزهره
هم مريت بالعباس
شفت الگمر طايح عالشريعه وراضي باليجره
زرت دار ومضيف السيد الشيرازي برض الطف
يعيد وعاينت شوگه اندفن وياه بالغربه
بچيت لذيچ امانيه وهواه الچان يتمنى
يرد لصحن ابو السجاد يمسي ويصبح بگربه
شفت ديوان اخوه سيد حسن(1)
خالي ينوح ودمعته بگلبه
شفت ذاك الهضيل الچان بالديوان ساچت صار مواله
بچيت ابدمعة اعيونك يعيد وعاينت حاله
***
يعيد بياوجه مريت عاالاحباب
علينه اتمر دموع اعيون منتثره
اشوفنك علينه اتمر يعيد بكل سنه وكل عام
واحنه انودع السيد يتاج بروسنه وكل هام
اشلون انعيّد بهاالعيد والقائد(2)
غريب بدولة الاجناب
****
رحت ياعيد لرض الغري اواديه وشفت صبره
رحت يم صوب ابو الحملات ذاك الما وگع سيفه ولا مره
زرت سوگ الچبير- اوصلت للميدان- شفت الناس بالدوره
زرت ذيچه مساجدنه وشفت بيها الشباب اشلون منتشره
شفت ابلادنه الحلو العزيزه الصارت امكدره
رحت يم صوب العماره وشفت چم حر المعذب وچم حره
يعيد آنه تره اشتاگيت اروحن يم اراضينه ولعد گيعانه السمره
يعيد انخاك هزني الشوگ اشوف اخيولنه الشگره
يعيد الروح ما تحمل هضم لا ضيم ولا عيشة غرب مُره
اظن طال الحديث اعليك سامحني اريد انخاك بس مره
اخبرك لا تجي بهالحال واحنه مشرّدين وبالغرب طشره
اريدن من يهل شهرك تماسينه وتصابحنه بربوع النجف والبصره
ولابعثي يظل عدنه وتشل ايد الوهابيه ويموت الناصبي بقهره
ونذب اهدومنه السوده ونغير كل حزن واحداد
اجاني العيد واحنه ابعيد عن فرحتنه والاعياد
|
